ئاگاداری

پێش بە قەڵاچۆی گەلی کورد لە سوریە بگرن!

هاونیشتمانیان

خوشکان و برایان

ئەوە پتر لە هەفتەیەکە، گەلی کورد لە عەفرین و ناوچە کورد نشینەکانی دیکەی سوریەدا، کەوتۆتە بەر هێرش و پەلاماری ئەرتەشی دژی گەلی تورکیە و لە ئاکامدا بە دەیان کەس لە خەڵکی بێدیفاع کوژراو بریندار بوون و  بە دەیان هەزار کەسیش لە ئابڵۆقەی هەمەلایەنەدا بەسەر دەبەن و لە ئەرز وئاسمانەوە بۆمباو ئاگر و ئاسنیان بەسەردا دەبارێت.

بەخۆشیەوە خەڵکی عەفرین و دەوروبەر ئازایانە و قارەمانانە دیفاع لەمان و مەوجودیەتی خۆیان دەکەن و بوونەتە سەرمەشقی خەبات و بەرخۆدان و مقاوەمەتی میللی و نیشتیمانی و بەسەدان حەمماسەی پڕ لە سەرفرازی و سەروەریان تۆمارکردوە

هەواڵەکان ئەوە دەگەیەنن کە هێزەکانی ئەرتەشی فاشیشتی تورکیە لەبەردان ئاڵقەی گەمارۆی خۆیان لە دەوری عەفرین تونتر بکەن و تەنانەت هێرشی خۆیان بەرینیتریش بکەنەوە.

لەو پێوەندیەدا ئێمە کوردەکانی دانیشتووی نۆروێژ، کە ئەمرۆ  شەممە، ٢٧.٠١.٢٠١٨ ی زایینی، لێرە کۆبوینەتەوە، داوا لە  نەتەوە یەکگرتوەکان و باقی ناوەندەکانی بڕیاردان وهەموو کۆڕوکۆمەڵە بەشەردۆستە کان و بیروڕای گشتی نۆروێژ و هەموو مرۆڤایەتی پێشکەوتوو دەکەین:

هەرچی زووتر پێش بەو لەشکرکێشیەی دەولەتی تورکیە بۆسەر عەفرین بگرن . نەیەڵن جارێکی دیکە قەڵاچۆکردن و ئەنفالی کوردان دووبارەو و چەند بارە بێتەوە. جیالەوە ئێمە پشتیوانی ئەخلاقی و مەعنەوی و سیاسی خۆمان بۆ خەڵکی خەبات گێڕی عەفرین دەردەبڕین و هەزاران جار ئافەرین و دەستخۆشیش بۆ ئەو ژن و پیاوە ئازایانە دەنێرین کە بە ورەیەکی پۆڵاینەوە بەرانبەر پەلامار و ئۆپەراسێۆنی لەشکری تورکیە وەستاون و بونەتە سەمبولی خۆڕاگری و بەربەرەکانی بۆ هەموو ئازادیخوازانی ناوچەکەو جیهان.

هەر ئێستا بەدەیان هەزارکەس لە خەڵکی بێدیفاع لە هەلومەرجێکی دژواردا بەسەر دەبەن. بۆیە داواش لە سەلیبی سوری نۆروێژ ورێکخراوی یارمەتیەکانی گەلی نۆروێژ دەکەین کە بە هەرجۆرێک کە بۆیان دەکرێ یارمەتیە ئینسانیەکانیان بگەیەننە ئەو خەڵکە بێدیفاعە  کۆمەگیان بکەن.

سڵاو لە مقاوەمەتی ئازایانەی خەڵكی عەفرین

سڵاو لە خەباتگێرانی کورد و غەیرە کورد کە  سنگیان کردۆتە قەڵغان و قەڵایەکی لە شکان نەهاتوو و داستانەکانی کۆبانی سەرلەنوێ دەنوسنەوە.

کۆمیتەی هاوکاری هێزەکوردستانیەکان لە نۆروێژ

٢٧.٠١.٢٠١٨

ئۆسلۆ

Facebook Comments
زياتر نيشان بدە

PDKI Norge

حیزبی دێموکراتی کوردستان ئێران

بابەتی زیاتر لە رووداو