هەواڵەکان

هاوپێوەندیی خۆمان لەگەڵ داخوازەکانی گەلانی وەزاڵە هاتووی ئێران دەردەبڕین

لە ئاکامی دەستەڵاتی گەندەڵ و سەرەڕۆیانەی حکومەتی کۆماری ئیسلامیدا، ئەمڕۆ ئێران  گیرۆدەی قەیرانێکی قوڵی سیاسی و ئابووری بۆتەوە.

لە لایەک  ناکۆکی نێوان دارودەستە جۆراوجۆرەکانی نێو دەستەڵات پەرەی ئەستاندوە. لەلایەکی دیکەشەوە هەژاریی رۆژلەرۆژ زیاتر، بێکاری و گرانی و مەینەت بەشی ژیانی لە زۆربەی هەرە زۆری خەڵکی وڵاتەکەمان  تاڵ کردوە. سەرەڕای هەموو ئەوانە لە نێوچونی ژینگە وفشارو پەڵەپەستۆی دەرەوە و دوورە پەریزکەتنەوەی ئێران لە ئاستی نێونەتەوەیی و ناوچەییشدا بە نۆرەی خۆی ئەو قەیرانەی هێندەی دیکەش توند تر کردوە. پاش تێپەرینی پتر لە سێ دەیە  بەسەر دەستەڵاتداریەتی ئەو ریژیمەدا، ئێستا ئیدی بۆ هەموو لایەک دەرکەوتووە کە دەستەڵاتی ئاخوندی  نەک هەر ناتوانێ هیچ کام لە گیروگرفتەکانی ئێران چارەسەرکات، بەڵکو بۆخۆی سەرچاوەو ماکەی هەموو ئەو بارودۆخە دژوارەیە کە وڵاتە خۆشەویستەکەمان ئەمڕۆ لە نێویدا بەسەر دەبات.

لەو چەند رۆژو هەفتانەی دواییدا، دونیا شاهیدی پەرەسەندنی بێزاریی و ناڕەزایەتی بەرینی  خەڵک لەسەرتاسەری شارو شاڕۆچکەکانی وڵاتەکەماندایە. پەرەسەندنی ئەو ناڕەزایەتیانە بە شێوەی خۆپێشاندان و وەرێخستنی بزووتنەوەی بەرینی ئیعترازی بە دژی سیاسەتەکانی ریژیم، بە دژی گرانی و ئاوسان و سەرکوت و زەبروزەنگی دام و دەزگا دەوڵەتیەکان، بە دژی نەبوونی ئازادی  و و پێشێلکرانی ماف و ئازدیە بنەرەتیەکانی هاووڵاتیان لە ئاستێکی بەریندا دێتە بەرچاو.

ئەو بزووتنەوە ئیعترازیانە ئەوە دەردەخەن کە ناڕەزایەتی خەڵک لە وەزعی مەوجود  گەیشتۆتە ئاساتێکی بەرز.  بەجۆرێک کە جامی سەبری خەڵک پڕبووەو ئیتر ئامادەن لە پێناو ئازادی و مافە سەرەتاییەکانی خۆیاندا بێ هیچ ترس و دوودڵیەک  بە دەستی خاڵی بڕژێنە سەر شەقامەکان  و داخوازیەکانیان بێننە گۆڕێ. بە پێچەوانەی ئیدیعای کاربەدەستانی رێژیم کە ئەو خۆپێشاندانە سەرتاسەریەی خەڵک بە پیلانی دوژمن دەزانن، بیروڕای گشتی ئەو حەرەکەتە جەماوەریە بەرینە، بە خواستی خەڵک بۆ پێکهێنانی ئاڵوگۆڕ لە قەلەم دەدا. ئاخر لە مێژە خەڵک هیچ ئومێدێکی بە پێکهاتنی هیچ چەشنە ئاڵوگۆڕیک بە قازانجی خەڵک و ئازادی  لە چوارچێوەی ئەو رێژیمەدا نەماوە.

لە راستیدا ئەوەی ئەمرۆ لە ئێران دەگوزەرێ، بە باشترین شێوە ئەوە نیشان دەدات کە خەڵک داوا دەکەن کۆتایی بە دەستەڵاتی ڕەش و سەرەڕۆی ئاخوندەکان بهێنرێت.  داوا دەکەن چەوسانەوە و سەرکوت و زەبرو زەنگ  کۆتایی پێ بێت. خەڵک داوای دامەزراندنی سیستەمێکی سیاسی دەکەن کە لە سەر بناخەی دێموکراسی و عەداڵەت دامەزرابێ.  سیستەمێک کە پێوەندیی ئاسایی دەگەڵ دراوسێکانی و کۆمەلگای نێونەتەوەیی هەبێت. بەجۆرێک کە ئێران چی دیکە وەک سەرچاوەی شەڕ و ئاژاو و تیرۆر نەناسرێ.

ئێمە هاوولاتیانی ئێرانی دانیشتووی نۆروێژ، کە ئەمڕۆ شەممە، ٦ی ژانۆیەی ٢٠١٨ی زایینی، لەبەردەرگای وەزارەتی دەرەوەی نۆروێژ و سەفارەتی کۆماری ئیسلامی کۆبوینەتەوە.هاتووین تا پشتیوانی خۆمان لە داخوازە رەواکانی گەلانی وەزالەهاتووی ئێران دەربڕین و هاوپێوەندی سیاسی و ئەخلاقی خۆمان لەگەڵ ئەو حەرەکەتە ئیعترازیانەنیشان دەین کە لە نێوخۆی ولاتەکەماندا و لە ئاستێکی بەرین و سەرتاسەریدا بە رێوە دەچن. لە هەمان کاتدا ئەو سەرکوت و زەبروزەنگە مەحکوم دەکەین کە هێزە سەرکوتکەرەکان رێژیم بە دژی خۆپێشاندەران و بۆ خەفەکردنی دەنگی ئەوان و پاشەکشەکردن پێ یان بە رێوەی دەبەن. داواش لە کاربەدەستانی نۆرویژ وبیروڕای گشتی نۆروێژ دەکەین کە پشتیوانی و هاوپێوەندیی سیاسی خۆیان لەگەڵ خۆپێشاندەران و  داخوازە رەواکانی گەلانی ئێران و خەباتی ئەوان بۆ ئازادی و دێموکراسی ڕاگەیەنن.

خەبەرەکان ئەوەدەڵێن کە رێژیم لەبەردایە هەموو هێزە دژی گەلیەکانی وەک بەسیج و سوپای پاسداران بۆ سەرکوت و ترساندن و خەفەکردنی دەنگی نارەزایەتی خەلک راکێشیتە مەیدان. هەر ئێستا شەقەمەکانی شارە گەورەکان بە جۆرێک میلیتاریزەکراون و زۆرتر وە مەیدانی شەڕوتێک هەڵچون دەچن تا شوێنی ژیان و کاروکاسبی. لە لایەکی دیکەشەوە رێژیم ئینتڕنێتی هەڵبڕیوە و کۆسپی گەورەی  بۆ ڕاگەیەنە گشتی و کۆمەلایەتیەکان پێکهێناوە تا خەڵک نەتوانن پێوەندی دەگەل یەکتر بگرن ودەنگی خۆیان بە دونیای دەرەوە راگەیەنن. لە هەلومەرجێکی ئاوادا خەلکی ئێران چاوەڕوانن تا بیرورای گشتی دونیاو کۆڕوکۆمەلە نێونەەوەییەکان لە هەموو تواناو پرستیژی خۆیان و کاناڵە دیپلۆماسیەکان کەڵک وەگرن تا رێژیم ناچارکەن رێز لە مافی هاووڵاتیان بۆ خۆپێشاندانی هێمنانە بگرێ و رێگابدات خەڵک بە ئازادی بیروبۆچونەکانی خۆیان دەربڕن و کۆروکۆبونەوەی هێمنانەو ئاشتیخوازانە بەرێوە بەرن. مافێک کە لە کۆنڤانسێونە نیونەتەوەییەکاندا بەرەسمی ناسراوە.

لێرەدا داواش لە هێزە نیزامی و ئینتیزامیەکان دەکەین کە پشتیوانی لەخەڵک بکەن و نەبنە گۆپاڵی رێژیم و سوپای پاسداران بۆ سەرکوتی خەڵک. ئاخر خۆشیان بەشێکن لەو خەلکە. هەروەها داواش لە هەموو هێزە نیشتیمانی و دێموكراتەکانی وڵاتەکەمان دەکەین کە یەکبگرن و لەسەر پڕۆژەیەکی میللی بۆ وەلانانی کۆماری ئیسلامی و دامەزراندنی رێژیمیکی دێموکڕاتیک  رێککەون. ئەوە باشترین وەڵامدانەوەیە بەو وەزعە کە لە وڵاتەکەماندا لە گۆڕێدایە.

تا دێ راپەرینی خەڵک بەرینتر دەبێتەوە. هەر بەو ئەندازەیەش رێژم سەرکوت و زەبروزەنگی خۆی پەرەپێدەدات. تا ئێستا بە دەیان کەس کوژراون، بە سەدان کەس بریندارن و بە هەزاران کەسیش رەوانەی شکەنجەگاکان کراون. ئەو خۆپێشاندانانە، بریتین لە ڕق و بێزاریی خەڵک لە سیاسەتەکانی رێژم، لەو فەقر و گرانی و هەژاری و مەینەتبەشی و بێکاریەی رێژیم بەسەر خەلکیدا سەپاندوە.  کەچی کاربەدەستانی رێژیم لەوپەڕی ڕووهەڵماڵاویدا ئەو خەلکە بە نۆکەر و مەئموری ئەمریکاو ئیسڕائیل و سعودیە لە قەڵەم دەدەن

ئێمە هاووڵاتیانی ئێرانی لە نۆروێژ کە ئەمڕۆ لێرە کۆبوینەتەوە، ئەو ئیدیعایانەی کاربەدەستانی ڕێژیم نەک هەر بە هێند ناگرین، بەڵکو ڕادەگەیەنین کە حەرەکەتە ئیعتڕازیەکانی گەلانی ئێران ریشەیان لەو واقعیەتە عەینی یەدا هەیە کە کۆماری ئیسلامی لەماوەی دەستەڵاتی خۆیدا پێکی بهێناوە. واتە مەینەت بەشی، سەرکوت، گرانی، بێکاری، نەبونی ئازادی و لەگۆرێدابونی بێ عەداڵەتی و هەڵاواردن و تەبعیز و پێشێلکرانی مافەکانی مرۆڤ.

هەر بۆیە هاتووین لێرە تا  بەدەنگی بەرز ڕاگەیەنین کە ئێمە پشتیوانی لە خۆپێشاندانی خەڵک لە نیوخۆی وڵادا دەکەین و خۆشمان بەشێک لەو جەماوەرەین کە ئەوە چەند ڕۆژە بومەلەرزەی خستۆتە کۆشکی ستەم و زۆرداری ئاخوندەکان. داوا لە دەولەت و گەلی نۆروێژ دەکەین کە لەو هەلومەرجە دژوارەدا لەپەنا گەلانی ئێران بن و لە خەبات بۆ ئازادی و دێموکراسی  و مافەکانی مرۆڤدا بە تەنیایان مەهێڵنەوە. داوای ئازدی بۆ هەموو زیندانیانی سیاسی بە گشتی و بەتایبەتی  ئازادکرانی ئەو کەسانەدەکەین کە لەو ڕۆژانەی دواییدا بە تاوانی بەشداری لە خۆپێشاندانەکان دا گیراون. داوای کۆتایی هاتن بەو سەرکوت و زەبروزەنگ و سەرەڕۆییە دەکەین کە کۆماری ئیسلامی پتر لە سێ دەیەیە بەسەر وڵاتەکەمانی سەپاندوە. داوا دەکەین کۆتایی بەو زوڵم و زۆری و بێعەداڵەتی و هەلاواردن و تەبعیزە بێت کە هەر لە هەوەڵەوە بەشێک بووە لە ماهیەتی دەستەڵاتی ئاخوندی. داوا دەکەین رێژیم هەموو هێزە سەرکوتکەرەکانی خۆی لە سەر شەقام و كوچەوکۆڵانەکان لابەرێ و بیانگێڕیتەوە بۆ بنکەو بارەگاکانیان و بەو جۆرە رێگا بۆ پێکهاتنی خۆپێشاندانی هێمنانەی خەڵک ئاواڵابکات.

داودەکەین لە هەموو ئیمکاناتی وڵات و ئیمکاناتی نێونەتەوەیی بۆ کۆتایی هێنان بەو گرانی و ئاوسان وفەقر و مەینەت بەشیە کەڵک وەرگیرێ کە خەڵکی ئێران دەگەڵی گیرۆدەیە. ئەوەش بەوە دەکرێ کە سەروەت و سامانی ئێران لە پێناو خێروخۆشی  و ڕەفاهی گەلانی  ئێراندا خەرج بکرێ، نەک بۆ بردنە پێشی سیاسەتە دژی گەلیەکانی رێژیم لە ناوچەکەدا، واتە پەرەپێدانی شەڕو تێرڕۆڕ.

داوا لە بیروڕای گشتی و کۆڕوکۆمەڵە نێونەتەوەییەکان، بەتایبەتی یەکیەتی ئوروپاو رێکخراوی نەتەوە یەکگرتوەکان دەکەین کە رێگا نەدەن رێژیم خۆپێشاندانی هیمنانەی خەڵک سەرکوتبکات و دەنگی بێزاریی و ناڕەزایەتی دەربرێنی ئەوان خەفەبکات و لەو رێگایەوە خۆپێشاندانەکانی خەڵک  ناچار بە گرتنەپێشی رێگای ڕادیکال بکات.

سەرکەوێت بزووتنەوەی ئێعتڕازیی خەلكی ئێران لە پێناو ئازادی و عەداڵەت.

سڵاو لە شەهیدانی رێگای ئازادی ئێران لە دیکتاتۆری و ئیستبدادی رەشی مەزهەبی

سڵاو لە خەڵکی قارەمانی ئێران، کە جارێکی دیکە بە دونیایان سەلماند کە ئامادەن باجی ئازادی و دێموکراسی بدەن و تاسەرکەوتن لەو رێگایەدا دەرؤنە پێش.

کۆمیتەی پشتیوانی و هاوپێوەندیی نیشاندان لەگەڵ خۆ پێشاندانەکانی خەڵکی ئێران/ نۆروێژ

ئۆسلۆ ٦ی ژانۆیەی ٢٠١٨

Facebook Comments
زياتر نيشان بدە

Chiya Qadri

ھاوکاری بەشی راگەیاندن و سه‌رپه‌ره‌شتیاری ماڵپه‌ڕ / نۆڕوێژ

بابەتی زیاتر لە رووداو